‘n boekwinkel wil ek besit
en donker koffie daaruit bedien
ek wil gesels met rustigheid
en skryf, of die waagmoed
bymekaarskraap om wel te skryf
om te kan skryf
sonder beplande mooi sê-woorde
om impulsief krapperig
met gelaaide ink
woorde aanmekaar te vleg
om verwronge en soms eenvoudige
droombeelde gestalte te gee
in ‘n minder vlietende vorm
sodat onbewuste onbewustheid
blootgelê kan word
– Francois van Dijk
koraal
grys
jy was
my hart se rooi
jou steak, jou groente, jou slaai, jou wyn
jou dans, jou lag, jou prentjies, jou prag
saam het ons geleef, anders
vanaand het jy my woorde gesteel
my gedagtes geboei
jou boeie laat my so bietjie bloei, rooi
ongelukkig, saam kan ons nie meer leef…ongelukkig
– Francois van Dijk
soos die nuwe oggendson
het jy gekom, in my ysblou oë
gestaar, gekyk, gesien, raakgesien,
en ek het daar gestaan.
jou warmte het my hart ontdooi
my hart laat klop
laat klop aan jou deurtjie
om my in te laat.
saam het ons
kos geflop en kos gemaak
swartpeper en rooiwyn
geruik en geproe.
nou sit jy daar
en ek is hier…
– Francois van Dijk
