Man tot man
| my seun
| noudat jy vier is
| is dit tyd om te praat
| oor die dinge wat ‘n boerseun raak
| ja, Pa het ook rugby gespeel
| twee armbreuke vir die eer van die skool
| en ja, Pa was in die army
| maar hulle het gesukkel om ‘n man van hom te maak
| askies, maar Pa kan nie sy dop soos ‘n man vat
| die buurvrou vry
| en die kaffers op hulle plek hou nie
| maar kom kniel hier by my
| ek leer jou bid
| ek leer jou lees uit ‘n boek
| hoe om die ganse wêreld
| in ‘n korreltjie sand
| te soek
| – Prevot van der Merwe (1952 – 2004)
die van dijk vraagstuk
ek sien haar, in
die see
die sonstrale
die sand
tog sy val deur my vingers
korreltjie vir korreltjie
glimlag vir glimlag
knipoog
grappie
liedjie
kasteel van sand
gebou met jou
in my hart(kamer) van stilte
sit ek met my purperrooi pinotage
kristal glas 2
bottel toe
kleine kurk, stop
die emosionele brander
en ek
staar vooruit, agteruit, alom
ek sit in stilte met my
purperrooi pinotage.
– Francois van Dijk