Lukas 10: Die Here roep na jou

Dink aan al die padverkeer op aarde; al die motors, motorfietse en vragmotors in al die stede, dorpe en landelike gebiede wat ry en stop, wegtrek, versnel en draai, en besef dat daar op hierdie oomblik meer aktiwiteit in jou brein aan die gang is!

 

So het jou brein met al sy gedagtes die vermoë om jou half afwesig te maak in die oomblik waarin jy nou leef. Dit is egter die enigste plek waar jy kan leef – jou brein steel dus jou lewe!

 

Daar is wetenskaplik bewys dat mense met ‘n wandering mind minder gelukkig is as mense wat in die hier en nou leef. ‘n Ander studie het gevind dat Aandaggebrek-hiperaktiwiteitsindroom (ADHD) bevorder word wanneer klein kindertjies baie TV kyk. Die TV leer ons aandag om rond te spring, met die gevolg dat dit al moeiliker word om die geraas van ander gedagtes stil te maak en aandag aan een ding te gee.

 

Moderne maniere van aandag gee wil jou nie toelaat om met jou liggaam kontak te maak of jou liggaam te laat ontspan of op enige manier meer in die hede teenwoordig te wees nie. Daar is nie tyd om tot rus te kom en sodoende dieper in die hier en nou in te daal nie.

 

In plaas daarvan om jou te bekommer, kan jy eerder daarop fokus om dit te doen wat nou goed is!

 

Kom ons oefen

 

  • Kyk na jou hande en sluit jou oë.
  • Voel hoe jou lyf nou voel.
  • Haal aandagtig asem: Trek jou asem ‘n bietjie dieper as gewoonlik in, voel die spanning in jou en voel dan die uitvloei van jou asem.
  • Herhaal dit nog twee maal.
  • Let op of jou lyf nou anders voel, al is dit minimaal.
  • Maak jou oë nou rustig oop en kyk weer na jou hande. Merk jy iets meer op as aan die begin van die oefening?

 

Kom ons lees Lukas 10:38-42 x2

 

Jesus en sy twaalf dissipels was op reis oppad na Jerusalem. Hulle kom toe aan in die dorpie Betanië waar hulle by Marta en Maria tuisgaan, waarskynlik was Lasarus ook daar soos ons dit in Johannes 11 vind. Betanië was Oos van Jerigo, teen die oostelike hang van berg Olivet. Die afstand tussen Betanië en Jerusalem was ongeveer drie kilometer.

 

Marta ontvang Jesus en sy twaalf dissipels as gas in haar huis, ‘n goeie huisvrou. En tot op hierdie punt is dit ‘n baie mooi en edele storie waaroor daar dalk in die Goeie Huishouding tydskrif geskryf kan word. Alles is goed in die lieflike huis in Betanië.

 

‘n Oomblik gelede het Marta vir Jesus hartlik ontvang en nou sit haar suster Maria reeds by die voete van Jesus, daardie selfde voete wat sy op ‘n later stadium sal salf. Hier sit sy nou en luister aandagtig na elke woord wat uit die hart van Christus kom en rol oor Sy lippe. Alles is goed. Alles is goed.

 

Maar Marta was baie bedrywig om alles klaar te maak (v40).

 

Arme vrou! Ons simpatiseer met haar, doen ons nie? Marta se gedagtes was getrek in alle rigtings. Sy het seker gedink: “Hoe sal ek ooit kan omsien na al die detail van hierdie spoggerige maaltyd: die voorgereg, die slaai, die vleis, die groente, die souse, die broodrolletjies, die nagereg, wie gaan waar aan die tafel sit? En dit alles vir:

 

  • Jesus en vir Lasarus
  • Maria en ook ekself Marta, plus
  • Petrus, Andrias, Jakobus en Johannes
  • Filippus, Bartholomeus,
  • Matteus, en Tomas ook,
  • Jakobus die mindere en Judas die meerdere,
  • Simon en Judas.

 

Al word Lasarus se naam van die lysie afgetrek omdat hy nie eksplisiet in die verhaal genoem word nie, is dit steeds vyftien mense!

 

Sy kom toe daar staan en sê: “Here, hinder dit U nie dat my suster my alleen laat bedien nie? Sê sy moet my kom help!” (v40).

 

Al  hierdie werk wat Maria doen, en Marta sit net daar…en niks doen nie! Marta ontplof van woede. Sy is uit die veld geslaan. Sy voel dat sy goeie rede het om kwaad te wees. In haar uitbarsting vind sy nie net met Maria fout nie, maar ook met Jesus wat haar toelaat om net daar te sit, sonder om iets te doen.

 

“Marta, Marta, jy is besorg en bekommerd oor baie dinge, maar net een ding is nodig. Maria het die beste deel gekies, en dit sal nie van haar weggeneem word nie.” (v41-42).

 

Die uitdrukking, “Marta, Marta” wys verseker dat Jesus afkeer wat sy sê. Marta was na binne bekommerd en na buite ontsteld. Dit is duidelik van die manier hoe sy opgetree en gepraat het oor baie dinge. Amper soos om te sê: “So ‘n groot ete was nie belangrik nie, inelkgeval, daar is dinge wat baie meer belangrik is as om te eet.”

 

Net een ding is nodig sê Jesus. Hierdie een ding het Maria gekies, om te luister na die woorde van Jesus. Kan daar feitlik enige iets meer belangrik wees as om heelhartig te luister na die woorde van ons Here Jesus Christus? Dit, en niks anders nie, is die gedeelte wat belangrik is en nooit weggeneem sal word nie.

 

Ons kan ook tereg vra of Jesus nie te hard op Marta was nie…

  • Behalwe vir die laaste goedjies, sou die maaltyd al gereed gewees het toe Jesus en sy dissipels daar aankom. Was daar nie altyd iemand vooruit gestuur om aankoms aan te kondig nie?
  • Dit beteken ook dat met aankoms een van die susters die geëerde gaste moes vermaak. Of eerder, moes gereed wees om by hulle voete te sit en te luister na hulle woorde. Om dit nie te doen nie, sou onwelvoeglik gewees het en nie goeie maniere nie. Daarom het Maria presies die regte ding gedoen.
  • Vers 40 wil dit laat klink asof Maria reeds voorheen in die kombuis gehelp het met die voorbereiding van die maaltyd.

 

Ons almal is soms sterker in die hier en nou teenwoordig as ander kere. Hoe voel ons oor die volgende stelling? “Ons gedagtes laat dikwels ‘n probleem ‘n skaduwee gooi wat langer en groter is as die ding self”. Hoe het Marta se gedagtes ‘n skaduwee gegooi oor die feit dat Jesus teenwoordig was in haar huis? Wat het Marta gekeer om die teenwoordigheid van Jesus Christus te omarm, om dit te geniet soos haar suster Maria?

 

Jesus stel aan Marta voor om oop vir die oomblik te wees, om teenwoordig te wees saam met Hom, in die hier en nou.

 

Hoe sluit Marta of Maria se ervaring by jou aan? Ons kan maklik bekommerd raak wanneer ons beheer word deur ons eie ego. Wat gaan die mense sê van my vuil kombuis? Die eintlike probleem kom na vore die oomblik as ‘n vuil kombuis belangriker raak as ‘n oomblik saam met die Here. Die Here roep jou in die hier en nou in.

 

Die Here is met jou, hier en nou, jy kort niks nie. Hy laat jou rus op sagte grasperke. Hy bring jou na waters waar daar vrede is. Hy gee jou nuwe krag. Hy lei jou op die regte paaie. Selfs al raak dit donker, hoef jy nie bang te wees nie, want Hy is met jou, hier en nou. Jy is veilig. Sy goedheid en liefde sal jou lewe lank met jou wees.

 

Die Here roep na jou, in die hier en nou.

Amen.

Leave a Reply

Your email address will not be published.